「费Sir时代」遗臣又将会少一人，英国传媒指曼联已经决定唔同後衞菲尔锺斯续约，意味呢位前英格兰国脚将於今夏约满，以自由身离队，结束12年红魔鬼生涯。

现年31岁嘅菲尔锺斯2011年被当时红魔主帅费格逊签入，由布力般流浪加盟曼联，原本表现唔错，但其後受伤患问题困扰，长期缺阵，上季仅5次披甲，今季更加未曾上阵，换言之佢已经有1年时间冇参加比赛。

曼联领队坦哈格亦早已经放弃呢位「玻璃脚」，干脆等菲尔锺斯今夏约满「自然流失」，由於佢太易受伤，脱魔之後会唔会继续球员生涯，实属疑问。

除咗菲尔锺斯之外，另一位曼联後衞杜安薛比亦不获续约，同样将於今夏约满离队，呢位25岁守将近年大部份时间被外借去阿士东维拉，上季被外借去拿玻里，今年1月被外借去英冠球队史笃城，但佢胜在仍然年轻，应该仲有机会翻身。