利物浦喺周六(20日)晚英超主场仅逼和阿士东维拉1比1，争入前4位参加下届欧联机会非常渺茫。由於今仗系红军今季最後一场主场赛事，会方特别为4位将会离队嘅球员占士米拿、罗拔图法明奴、拿比基达同阿历士张伯伦举行告别仪式，罗拔图法明奴更加取得入球，可惜未能为球队赢波。

拿比基达同阿历士张伯伦今场冇份披甲，至於占士米拿、罗拔图法明奴等到72分钟後备上阵，後者临完场前入波，协助利物浦逼和对手1比1。由於红军已落後第4位曼联3分，仅剩下1场联赛，反观曼联仲有2场联赛在手，利物浦入前4位机会近乎绝望。

效力咗利物浦8年嘅罗拔图法明奴赛後流下男儿泪，显得依依不舍，但佢好快平复心情，同球迷签名及合照道别，盛传国际米兰及皇马都有意签呢位31岁巴西前锋。

至於同样效力利物浦8年嘅37岁老将嘅占士米拿表示，唔排除将来会重返红军效力，有传佢即将转投白礼顿。

赛後利物浦为「离队4子」颁发比赛相片集作为纪念品，答谢佢哋对球队嘅贡献。