意甲名牌祖云达斯因造假帐事件，日次「再次」被勒令扣10分，原本已经到手嘅欧联席位又呕番出嚟。虽然祖云达斯被扣分，令意甲前列球队全部获益，不过罗马教练摩连奴就直斥判决系「笑话」，因为如果佢一早知道祖记会被扣分，罗马就唔会放弃联赛转攻欧霸。

祖云达斯被扣分後跌落第7位，原本第5位嘅AC米兰(64分)突然升上第4，阿特兰大(61分)同罗马(60分)亦齐齐升级，罗马教练摩连奴就话：「喺联赛最後2轮先话扣分系个笑话，对祖云达斯同所有人都系，如果我一早知道，之前对蒙沙同博洛尼亚嘅取态会完全唔同。」

已经杀入欧霸决赛嘅罗马，近6场联赛只有4和2负，好大程度系佢哋谂住欧联无望，所以集中火力踢欧霸盃，对蒙沙(1比1)同博洛尼亚(0比0)两场联赛，罗马就收起大部份主力而失分，如果呢2场都赢到，佢哋依家就会同AC米兰同分。