曼联煞科战赢富咸散场後，有球迷目击富咸领队马高施华喺停车场守候，一见到费特出嚟就上前攀谈，之後拉埋一边密斟，引起转会揣测。

一直盛传曼联今夏中场大换血，费特同麦汤米尼两名大後备将被清洗，费特同曼联合约仅余1年，续约机会不大，而对佢嚟讲转投富咸系唔错选择。

富咸今季重返英超企稳第10位，前曼联中场安达斯彭利拿，仲有前阿仙奴翼锋韦利安都喺富咸重生，今次马高施华大庭广众捉住费特倾偈，有球迷猜测系转会先兆。

英超传媒披露，曼联今夏接受各队报价斟介费特，呢位巴西中场喺《转会市场》身价为1700万镑(约1.64亿港元)，富咸如果想出手，相信曼联唔会拒绝。