周四(8日)凌晨欧协联决赛，英超球会韦斯咸凭查洛保云喺补时绝杀，2比1击败意甲嘅费伦天拿，成功赢得冠军。韦斯咸自1965年赢欧洲盃赛冠军盃，相隔58年再次成为欧洲冠军。

呢场喺布拉格上演嘅决赛，上半场双方势均力敌，费伦天拿控球较多但系威胁性唔大，基斯坦奴比拉基曾被球迷掷物掟到流血，半场两队踢成0比0平手。

换边後两队开始埋牙，62分钟基斯坦奴比拉基手球输12码，宾华马为韦斯咸操刀射入，不过费伦天拿5分钟後即由邦拿云度拉追平，以为要踢加时之际，查洛保云喺90分钟单刀射入，为韦斯咸绝杀赢波。

今次系韦斯咸自1980年赢英足盃冠军後，43年来首个重要赛事冠军，更加系58年来首次成为欧洲冠军，领队莫耶斯赛後表示：「好神奇！我有个漫长嘅足球生涯，但好似呢啲夜晚并唔常见，比赛嘅过程唔系我预料，但最後都拎到想要嘅成绩，赢得第1个冠军系非常重要。」