国际米兰前锋卢卡古喺欧联决赛「阻碍」队友入波，兼连番失机，成为输波罪人，预料将被退货，今夏借用期届满後，还番畀车路士，但车仔亦无意收回呢位比利时国脚，据悉沙特阿拉伯豪门希拉尔乘虚而入，向呢位30岁射手开出一份薪酬总值5,000万欧元(约4.2亿港元)2年合约，利诱佢加盟。

卢卡古今季为国米上阵37场仅入14球，相比佢首度效力呢支意甲劲旅期间，踢95场入64球有天壤之别，会方已无意留用佢。至於车路士早前宣布由普捷天奴接手领军後，对於收回卢卡古，亦有保留，令佢前途成疑。

由於希拉尔争取签入美斯嘅计划失败，呢位阿根廷球王已加盟美职球队国际迈亚密，惟有另寻星级前锋，所以趁卢卡古面临「失业」，开出天价人工吸引佢来投。若然成事，沙特联赛将拥有3位神锋C朗、宾施马、卢卡古。

不过，据悉卢卡古唔想去沙特阿拉伯搵食，就算被国际米兰、车路士放弃，都仍然希望加盟欧洲5大联赛其他球队。