德甲冠军拜仁慕尼黑正式宣布签入今夏恢复自由身嘅多蒙特左後衞拉菲尔古里路，双方签约3年，呢位29岁葡萄牙国脚今季德甲贡献12次助攻，成为德甲助攻王，拜仁可以免转会费签入呢位猛将，真系执到宝。

拉菲尔古里路技术全面，可以胜任左後衞及左中场，佢2016年加盟多蒙特之後，总共上阵224场入40球及50次助攻，属於侧击高手。此前，多蒙特曾经提出同拉菲尔古里路续约3年，但佢拒绝，并选择加盟拜仁慕尼黑，明显希望一尝德甲冠军滋味。

事实上，拜仁以往都曾经抢走宿敌多蒙特主力，包括罗拔利云度夫斯基、马里奥葛斯，今次轮拉菲尔古里路成「仁」，既可减弱对手实力，仲能够壮大本身阵容，可以话系一石二鸟。

值得一提，拜仁慕尼黑早前亦免转会费，签入另一支劲敌RB莱比锡嘅中场干拉特赖马，今夏收获丰富。