西甲劲旅皇家马德里正式宣布，同中场莫迪历续约1年至2024年6月30日，粉碎呢位37岁克罗地亚老将去中东掘金嘅传闻。早前有消息指有沙特阿拉伯球会向莫迪历提供一份薪酬总值高达2亿欧元(约17亿港元)嘅2年合约，但佢宁愿赚少啲，都要留队继续踢高水平赛事。

莫迪历今夏约满，近期不断传出佢可能离队，跟随前队友宾施马去沙特阿拉伯搵食，盛传当地有球会向「魔笛」开出一份1亿欧元年薪嘅2年合约。莫迪历经过考虑之後，最终都系选择同皇马续约，意味佢将於今年11月超越柏高巴约，成为皇马史上第2大年纪球员，至於「银河舰队」史上最大年龄球员系已故名宿普斯卡斯，佢当年喺皇马挂靴已经39岁零36日。

莫迪历2012年由热刺加盟皇马，一直属於球队主力，虽然佢年纪唔细，但上季仍然上阵52场，射入6球及6次助攻。皇马早前亦同另一位中场老将却奥斯续约1年，加上3位新星曹亚文尼、卡马云加、祖迪比宁咸，令皇马中场线集经验同活力於一身。