将会为西班牙U21出战欧国盃8强嘅门将坦拿斯，上星期公开宣布约满巴塞隆拿离队，不过据西班牙《世界体育报》报道，巴塞隆拿喺周五(30日)合约最後1日，突然改变主意，启动佢合约内续约2年嘅条款，意味呢位「小狂牛」将继续效力巴塞隆拿。

22岁嘅坦拿斯同巴塞隆拿合约夏天完结，佢上星期向传媒表示：「系，我会离开巴塞隆拿，球会已经通知我唔会启动续约条走。」不过随住佢喺U21欧国盃表现出色，上阵2场都冇失球，巴塞隆拿就改变主意，喺合约完结前1日启动续约2年条款。

据西班牙传媒报道，由於达史特根同恩拿斯奥彭拿已稳坐正、副选门将位置，预计巴塞隆拿会将坦拿斯外借去其他西甲球会，消息指新升班嘅拉斯彭马斯对佢非常有兴趣，并愿意承担佢150万欧元(约1,280万港元)年薪。