哥斯达黎加喺世界足坛地位唔高，不过亦出产过基罗拿华斯、祖尔甘保等球星，曾效力过阿仙奴嘅31岁前锋祖尔甘保，更加系少数踢匀英超、西甲、法甲、意甲同葡超嘅哥国球员。喺领军出战今届美洲金盃前，祖尔甘保就决定返国加盟阿拉祖兰斯，希望回馈祖国。

上季效力墨超球会利昂嘅祖尔甘保，上月加盟阿拉祖兰斯系哥斯达黎加轰动新闻，据报4万镑(约40万港元)周薪更加系当地联赛史上最高纪录，加上佢拒绝重返出道球会萨普里沙，亦引嚟唔少争议，被球迷炮轰佢见利忘义。

不过，祖尔甘保就用行动为自己洗白，表明回归哥斯达黎加系要推动足运，早前就宣布喺圣何塞建一个高科技训练中心培育球员，中心内有齐球场、泳池、实验室、理疗室、营养同心理辅助等设备，祖尔甘保表示：「好兴奋呢个计划得到落实，我想回馈番畀呢个社会，唔单止系运动员，仲系畀所有想过健康生活嘅人。」