曼联签入车路士中场美臣蒙特之後，仍然准备继续增添中场人脚，根据意大利媒体《Violanews》爆料，红魔鬼已经同费伦天拿中场苏夫恩岩拉伯特达成个人待遇条款，将会签入呢位26岁摩洛哥国脚。

苏夫恩岩拉伯特喺荷甲出道，曾经效力乌德勒支、飞燕诺，其後转投比甲布鲁日，4年前被外借去意甲维罗纳，近3季一直属於费伦天拿主力，有份协助球队打入今届欧协联决赛，亦系摩洛哥打入上年世界盃4强嘅功臣，由於表现出色，早已获欧洲各大球会垂青，加上佢踢防守中场因而有「摩洛哥加度素」之称。

苏夫恩岩拉伯特上月为摩洛哥踢完对维德角嘅热身赛後，突然缺阵4日之後嘅非国盃外围赛，领队列格拉基爆响口话佢需要处理转会事务：「岩拉伯特今年踢咗好多比赛，我唔想佢冒险，特别系佢好快会转投新球会。」岩拉伯特嘅经理人亦指费伦天拿对於出售呢位防守中场持开放态度，只要价钱合理就会放人。

除咗曼联之外，巴塞隆拿、马体会都睇中苏夫恩岩拉伯特，以目前情况睇，似乎红魔鬼占先机。