沙特阿拉伯联赛今夏向欧洲球坛疯狂挖角，多支劲旅都成功签到大牌球星，上年底率先引入C朗拿度嘅艾纳斯，周二(4日)终於有着落，宣布以1,800万欧元(约1.54亿港元)签入国际米兰中场波索域，以2,500万欧元(约2.13亿港元)年薪签约3年。

睇住冠军伊蒂哈德签入宾施马同尼高路简迪、希拉尔又抢到鲁宾尼维斯同高列巴尼，艾纳斯当然要抢人辅助C朗拿度，30岁嘅波索域本来系巴塞隆拿猎物，不过艾纳斯最终都赢出呢场争夺战，艾纳斯twitter宣布嗰阵亦暗寸巴塞：「全世界都想要波索域，但波索域只要我哋！」

艾纳斯签入波索域後仲会继续增兵，早前佢哋已非常接近收购车路士翼锋薛耶治，不过呢位摩洛哥球星体测出现问题，能唔能够成事仲系未知数，亦有传闻指艾纳斯正高薪邀请啱啱约满曼联嘅迪基亚加盟。