沙特阿拉伯联赛再获猛人加盟！英格兰名将谢拉特周二(4日)宣布执教伊蒂法克，双方签约2年。伊蒂法克虽然唔系沙特主权财富基金(PIF)旗下4大球会，但佢哋亦有足够财力挑战列强，据报谢拉特已瞄准多名顶级球星，组军第一击更会向母会利物浦埋手，希望签入「红军」队长佐敦轩达臣。

43岁嘅谢拉特上年被阿士东维拉炒鱿後一直无业，2星期前获邀去沙特倾谈合作，当时谢拉特表示：「沙特请我过嚟倾合作，但呢一刻我唔会行呢条路。」估唔到半个月後情况180度转变，伊蒂法克周二宣布谢拉特加盟，主席艾达巴兴奋表示：「谢拉特嘅加盟，令到沙特联赛再向前跨出巨大一步！」

伊蒂法克上季沙特联赛只排第7位，阵中亦冇任何着名球星，虽然佢哋冇PIF嘅「无限资金」做後盾，但本身财力亦相当强大，谢拉特嘅上任亦会揭开疯狂组军序幕，英国《每日邮报》消息指，利物浦队长佐敦轩达臣系头号猎物，而菲腊比古天奴、艾华路莫拉达同奥巴美扬都系目标名单之一。

作为利物浦「传奇队长」，谢拉特同现任「红军」队长佐敦轩达臣曾做过4年队友。佐敦轩达臣同球会仲有2年合约，不过利物浦今夏决心年轻化，中场线已引入阿历斯麦亚里士打同苏保斯拉尔，加上居迪斯锺斯、哈维艾利洛等新星崭露头角，今次可能系33岁嘅佐敦轩达臣最後一个获丰厚肥约嘅机会。