车路士经过今个夏天大清洗後，球队呢2年阵容已面目全非，随住队长艾斯派古达离队，高华锡、尼高路简迪、佐真奴等亦先後走人，新帅普捷天奴亦要安排新队长接班，而环顾车路士依家嘅人脚，巴西中坚堤亚高施华接任似乎呼之欲出。

艾斯派古达喺车路士效力11年，自从泰利喺2017年离队後，佢就接任车路士队长一职，依家呢位西班牙老将离队，但可以继任嘅人选唔多。目前车路士只剩堤亚高施华一个超过30岁球员，而且佢亦做过巴西国家队队长，经验同领导力都系一流，唯一问题系佢同车路士依家每年续约，38岁嘅佢唔喺长远计划之中，可能好快又要换队长。

其他候选人方面，列斯占士同史达宁都系考虑之列，其中青训出身嘅列斯占士理论上系合适人选，不过消息指佢本身性格安静，未必做到带领一班球星嘅重任，而史达宁只系加盟1季，亦建立出更衣室核心嘅地位，所以普捷天奴好大机会暂时安排堤亚高施华接掌队长臂章。