「死神」艾朗蓝斯终於有着落，以自由身重投母会卡迪夫城，同呢支英冠球队签约2年，32岁嘅艾朗蓝斯仍然雄心壮志，豪言要协助卡迪夫城重返英超。

艾朗蓝斯喺2007年4月首次为卡迪夫城披甲，当时只有16岁零124日，成为球队史上最年轻上阵球员，呢个纪录至今无人能破，迅速吸引各大豪门注意，2008年夏天被阿仙奴收购。佢效力兵工厂长达11年，协助球队捧过3次英足盃冠军，艾朗蓝斯以往入波之後，往往就有名人逝世，因而有「死神」之称。

艾朗蓝斯4年前以自由身转投祖云达斯，获得40万镑(约409万港元)周薪，但表现不似预期，曾经被外借去格拉斯哥流浪，上年夏天转投法甲球队尼斯，但仅1季就被解约，依家重返卡迪夫城，将会着10号球衣，担任中场指挥官。

艾朗蓝斯话：「好开心可以重返卡迪夫城，觉得以往错过好多事情，亏欠球队同球迷好多，卡迪夫城近年来经历高低起伏，我现时目标就系协助球队重返英超。」卡迪夫城上季仅勉强护级成功，艾朗蓝斯想达成升上英超嘅目标，似乎比较大谂头。