美国女足今届世盃力争3连霸，阵中有唔少经验丰富嘅冠军级球星，第4度出战决赛周嘅雅历丝摩根就系其中之一，之前3届世盃佢拎到2冠1亚，不过雅历丝摩根今届就以全新角色登场，佢系美国女足阵中3个「新手妈妈」之一，期待以妈妈身份创下纪录。

美国女足今届有「妈妈兵团」，34岁嘅雅历丝摩根、同样31岁嘅艾尔丝同邓妮都初尝做妈妈滋味，雅历丝摩根表示：「今次系我第1次以妈妈身份踢世盃，所以我想代表所有妈妈级嘅运动员，证明我哋都可以喺最高水平嘅比赛竞争，我觉得好兴奋。」

雅历丝摩根依家有个3岁女儿，虽然踢波以外仲要兼顾家庭，不过雅历丝摩根就话做咗妈妈对佢比赛有帮助：「带埋个女去国家队感觉好特别，美国队依家有3个妈妈，好多谢足总同教练支持，我嘅内心更加平静，只系想享受每个世盃时刻。」如果美国女足今届夺冠，将会成为史上首支喺世盃3连冠嘅球队。