美国举行嘅热身赛上演伦敦打吡，车路士硬撼富咸。车仔喺新帅普捷天奴麾下表现回升，新兵尼高拉斯积逊已经开斋，信心爆棚，富咸近两仗失4粒，明显以攻代守，随时合演入球骚。（Now 621周一凌晨2时45分直播）

车仔今夏由前热刺教头普捷天奴执教，立即面对球队「瘦身」行动，尼高路简迪、高华锡、夏维斯、高列巴尼、奥巴美扬等离队，幸好「肥普」预咗要重建，除重用上季买番嚟嘅梅迪历、马度基外，仲有今夏加盟嘅尼干古、尼高拉斯积逊等新兵。车仔已经踢咗3仗热身赛，先赢域斯咸同白礼顿，上仗靠尼高拉斯积逊建功打和纽卡素，佢连续两仗有士哥，有助增强信心，而车仔呢3仗共轰10粒，但只得一仗冇失波，踢法非常进取。

另边厢，富咸最近有射手阿历山大米祖域扭计想走人，因此签入狼队中锋鲁尔占美尼斯，不过防守不稳，佢哋踢咗两仗热身赛，先以3比2险胜宾福特，上仗则净吞阿士东维拉两蛋，确系唔多稳阵。加上大家都系试阵为主，相信踢得好开放，入球骚可期。