周二(1日)晚有场重量级热身赛，巴黎圣日耳门（PSG）同国际米兰，喺东京新国立竞技场斗法。PSG头几场热身赛表现一般，新帅安历基急需一场胜仗省番靓个招牌，预计尼马会正选披甲，加上佢哋近年斗国米成绩唔错，有望赢番场，主Ｗ可取。（无綫myTV SUPER周二晚6时直播）

PSG成个暑假嘅头条，就系畀基利安麦巴比转会消息抢晒风头，其实安历基已经静静鸡咁帮PSG磨紧剑，收购咗唔少新兵，包括皇马攻击球员马高阿辛斯奥、国米後衞史坚尼亚、拜仁後衞卢卡斯靴南迪斯，仲有士砵亭嘅乌拉圭新星曼纽尔乌加迪。

不过佢哋头3场热身赛只得1胜1和1负，上场反输畀大阪樱花2比3更令人跌晒眼镜。佢哋踢埋今场，再喺南韩斗全北汽车之後，就会返法国准备开季，系时候认真啲。法国传媒报道，安历基会尽遣强阵，尼马、阿舒拉夫同卡路士苏拿将重回正选。

国米热身赛安排循序渐进，先搵支意丙球队拍跳，赢10比0打起信心，跟住同有C朗在阵嘅艾纳沙踢成1比1。呢支上届欧联亚军转会同样动作多多，多达7名球员加盟，不过意甲喺8月下旬先开咧，领队施蒙尼恩沙基仲有时间试阵，今场胜负未必太上心，相反PSG急需一场胜仗挽面子，好彩佢哋近4次热身赛斗国米获3胜1和，可以秤高少少。