热刺前锋哈利卡尼今夏能否转投拜仁慕尼黑，相信好快有答案，热刺传奇射手连尼加以过来人身份，力撑呢位後辈离开母会，出去其他联赛闯天下。

现年62岁嘅连尼加出身於李斯特城，亦效力过爱华顿，1986年转投巴塞隆拿，但表现一般，其後於1989至92年效力热刺，上阵138场入80球，佢话：「我认为哈利卡尼将会离队，佢亦应该咁做，现时系佢离开热刺嘅好时机，拜仁慕尼黑属於世上最伟大球会之一，哈利卡尼已经系热刺及英格兰国家队史上最多入波嘅球员，但足球系以夺取团队冠军为荣，而非个人纪录，我睇唔到热刺来季可以打入英超前4位，如果卡尼转投拜仁，都赢唔到冠军，咁佢就真系地狱黑仔王。」

连尼加仲讲笑话，如果卡尼转投拜仁，另一位英格兰传奇射手舒利亚一定会亲自送机，因为佢可以保住英超史上入球王纪录，舒利亚累积260个英超入球，哈利卡尼以213球排第2位。