热刺日前以1亿镑(约10亿港元)卖走王牌前锋哈利卡尼，预计今个月会物色新球员替补。近日有意大利媒体爆料，指热刺正同车路士接触，打算「截胡」抢购祖云达斯猎物卢卡古，不过消息就令唔少热刺球迷不满，认为卢卡古同哈利卡尼「差几班」。

意大利记者Alfredo Pedulla爆料，祖云达斯用杜辛华荷域交换卢卡古嘅谈判，迟迟未达成共识，即使卢卡古同祖记已经倾掂个人条件，车路士领队普捷天奴对杜辛华荷域仍有保留，佢哋更倾向将卢卡古直接出售，而热刺喺卖走哈利卡尼後，已接触卢卡古准备提出收购。

不过，热刺球迷普遍唔同意呢个计划，大批网民留言洗版：「应该系意大利传媒吹水，热刺唔会咁蠢」、「如果真系李察利臣拍卢卡古，我以後唔会再睇波」、「将哈利卡尼变成卢卡古，就系热刺打破冠军荒嘅计划？」