韦斯咸放弃收购曼联中坚哈利马古尼之後，已经搵到新目标，根据英国《太阳报》爆料，主帅莫耶斯睇中德甲球队史特加中坚马夫洛柏路斯，希望将呢位前阿仙奴後衞带返伦敦。

哈利马古尼因为「补偿金」问题同曼联倾唔掂数，导致转会交易迟迟未能完成，由於英超已经开锣，韦斯咸领队莫耶斯想尽快签入中坚，决定唔再等呢位英格兰国脚，转移目标斟介马夫洛柏路斯。

现年25岁嘅马夫洛柏路斯曾於2018至22年效力阿仙奴，但只为兵工厂上阵8次，大部份时被外借去德乙球队纽伦堡、德甲球队史特加。呢位身高1米94嘅希腊国脚制空力强，往往可以利用罚球或角球，创造威胁，佢喺2021/22年球季为史特加踢31场德甲，并有4球进帐，会方上年夏天决定买断佢，马夫洛柏路斯上季德甲上阵28场亦入2球。

马夫洛柏路斯身价大约1,500万镑(约1.5亿港元)，仅及哈利马古尼一半，韦斯咸签佢，的确比较划算。