意甲劲旅国际米兰正式宣布，以先借後买方式签入博洛尼亚前锋阿拿奥杜域，顶替早前离队嘅射手卢卡古。呢位34岁奥地利国脚曾於14年前同样以借用身份为国米效力，估唔到有机会回巢。

身高1米92嘅阿拿奥杜域有「奥地利伊巴谦莫域」之称，佢喺荷甲球队川迪出道之後，曾於2009/10年球季被外借去国际米兰，以为前途一片光明，但只为国米上阵3次就被退货。其後效力过云达不来梅、史笃城、韦斯咸，甚至去过中超搵食，2年前重返意甲加盟博洛尼亚，近2季联赛分别入14球及10球，曼联一度有兴趣签佢做「替工」，但因为阿拿奥杜域曾涉及种族歧视事件，遭红魔鬼球迷反对而作罢。

不过，国米好欢迎阿拿奥杜域回巢，形容佢身体强壮、技术出众，系一位完美进攻球员，阿拿奥杜域亦希望重返国米後，可以证明实力，弥补当年黯然离队嘅遗憾。