利物浦今夏增兵极不顺利，已经喺球员争夺战中3度败阵，嚟紧可能有第4次！红军斟介多时嘅狼队中场马菲奥斯纽尼斯，近日答应曼城邀请加盟，转会费同利物浦开出嘅一样系5,000万镑(约5亿港元)，蓝月为免夜长梦多，想喺48小时内落实交易。

利物浦阵容大换血，今夏已签入阿历斯麦亚里士打、苏保斯拉尔同远藤航，但都未够，佢哋最想要嘅祖迪比宁咸拣咗皇马，摩西斯卡些度同罗美奥拉维亚又被车路士截劫，近日全速斟介马菲奥斯纽尼斯，但又可能临门一脚输畀曼城，认真当衰。

转会专家罗曼诺报道，24岁葡萄牙国脚马菲奥斯纽尼斯已经答应曼城嘅个人条件，同意加盟，曼城向狼队开出5,000万镑转会费，只要狼队接受就可完成交易，曼城同时向雷恩斟介比利时新星谢利美杜古，转会费6,000万欧元(约5.1亿港元)，希望喺转会窗关闭前，搞掂两单转会。