曼联嚟到第三场联赛，将会主场迎战诺定咸森林，绝对系一场不容有失嘅赛事。老实讲第一场虽然赢狼队，但赛後因为一个漏判嘅12码成为饭後热话，第二场对热刺更输波而回，如果今场都赢唔到的话相信回响会愈嚟愈大。

季前新加盟嘅美臣蒙特因伤今场避战，头两场比赛感觉上美臣蒙特同般奴费南迪斯分工上有少少重叠嘅感觉，最惨佢哋进攻又落唔切帮卡斯米路做防守工作。今场要面对众所周知反击快嘅森林前锋班伦庄臣、艾禾尼尔同基比斯韦特呢个三叉戟组合，真系有少少担心曼联。森林可能成场唔多攻势，但一下就入你波，所以曼联班後防真系要打醒十二分精神。

今场亦会系我嚟到英国第一次现场睇嘅英超比赛，初嚟报到就入「梦剧院」奥脱福睇波，仲要俾我搵到桌球手兼曼联球迷传家俊呢个重量级人马陪我睇波，希望最後可以睇到佢爱队三分袋袋平安。