周二(29日)凌晨西甲赛事，马德里体育会继续展示争标实力，作客7比0狂胜华历简奴，创造球会史上西甲最大作客胜仗纪录。马体会教练施蒙尼赛後表示，佢哋会尝试挑战皇家马德里同巴塞隆拿嘅霸权，但就担心沙特球会「搞乱档」。

马体会今个夏天未有花大钱买人，不过整体实力仍得到保持，头2轮联赛1胜1和後，今仗入局极快，基沙文开波2分钟先开纪录，加埋迪比同拿侯尔摩连拿入波令客队上半场领先3比0。换边後马体会冇留手，艾华路莫拉达梅开二度，安祖哥利亚同马高斯洛兰迪亦有斩获，最终马体会有6个球员入波下狂胜7比0。

施蒙尼赛後表示：「我好锺意球员今场表现，我哋系支好有竞争力嘅球队，皇马同巴塞喺西甲超班，但马体会都好有份量，如果佢哋有咩失准，我哋会随时准备好。」马体会冇钱买人，但施蒙尼更担心主力会被沙特挖角：「转会窗结束系件好事，不过最危险系沙特，佢哋喺欧洲转会窗完结後仲可以买人，希望唔会发生喺我哋身上。」