沙特球会今个夏天疯狂招星，宾施马、尼马、沙迪奥文尼、佐敦轩达臣、尼高路简迪等巨星相继登陆，佢哋共通点都系已经进入足球生涯「黄昏期」，想掘最後一桶金都系人之常情，不过西甲「新人王」加比尔维加周一(28日)正式加盟吉达艾阿里就令球迷哗然，却奥斯早前亦批评佢去沙特嘅决定「尴尬」。

21岁嘅加比尔维加上季喺切尔达大爆发，被誉为西甲最强新人，传闻利物浦、阿仙奴、纽卡素等豪门对佢有兴趣，意甲冠军拿玻里原本已同切尔达倾担4,000万欧元(约3.4亿港元)，点知吉达艾阿里随後加入战团，结果加比尔维加决定去沙特搵食，消息传出後，皇家马德里中场却奥斯亦喺新闻上留言「尴尬」。

西班牙传媒报道，加比尔维加今次同吉达艾阿里只系签约3年，人工总值3,000万欧元(约2.54亿港元)，呢位进攻中场打算3年後再回流欧洲，到时佢仍然只系得24岁，仍然可以喺欧洲球坛有一番作为。