利物浦喺周一(28日)凌晨英超绝地反胜纽卡素，荷兰中坚华基尔云迪积克(VVD)食红牌几乎成为罪人，佢被逐後一度拒绝离场，仲疑似爆粗辱骂球证，随时面临「加监」。曼联名宿加利尼维利指VVD喺几年前「高峰期」唔会犯呢啲错，暗示呢位荷兰中坚已过气。

VVD自2018年加盟利物浦後，一直被誉为英超最佳中坚，今场系佢英超生涯首次被逐，原来阻挡对手入球机会嘅红牌只需停赛1场，不过VVD被影到爆粗辱骂球证，出到场边又同第4球证争执，要领队高普出面将佢拉走，唔排除会被英格兰足总「加刑」。

对於VVD嘅红牌事件，加利尼维尔表示：「比着系几年前高峰期嘅VVD，佢肯定唔会尝试呢种拦截，而系等伊沙克控波後再塞住佢去路。依家仲要走去骚扰球证，明知道咁样做系改变唔到事实，佢应该乖乖哋返更衣室检讨自己。」