皇马中场大将莫迪历今季被教练安察洛堤投闲置散，3场西甲都屈居後备，平均每场仅上阵19分钟，明显已唔属於球队计划之内，「肥安」更暗示如果有人改变主意，去沙特阿拉伯搵食，佢并唔会阻止。呢位即将38岁克罗地亚老将随时可能会接受吉达艾阿里邀请，同罗拔图法明奴拍住上。

莫迪历效力皇马11年，捧过3次西甲及5次欧联等多项锦标，前队友宾施马今夏转投伊蒂哈德，已传出莫迪历都考虑加盟吉达艾阿里，佢最终选择续约1年。不过，皇马主帅安察洛堤今季锐意将球队年轻化，3位「00後新星」祖迪比宁咸、卡马云加、曹亚文尼及25岁嘅费达历高华维迪，成为中场新骨干，莫迪历今季3场联赛都只能後备上阵。

安察洛堤被传媒问到点解冷落莫迪历，佢话：「好多人认为莫迪历担任後备系奇怪嘅事，佢可能觉得唔开心，但佢表现得唔错，现时阵容已经确定，但所有人都有可能改变主意去沙特，我唔知边个会改变主意，但我唔担心。」

西班牙媒体《DC》指皇马愿意出售莫迪历，但要求6,000万欧元(约5.1亿港元)转会费，呢个价钱明显为沙特豪门「度身订造」，吉达艾阿里一直好想签入莫迪历，相信唔会介意畀「少少钱」，依家就系睇莫迪历自己决定去留。