夏天同诺定咸森林约满嘅连格，等足成个暑假都未有班落，不过据伦敦《标准晚报》报道，30岁嘅连格有望同韦斯咸签短期合约，重返呢支2年前令佢「咸鱼翻生」嘅球会。

连格喺曼联出道後事业发展每况愈下，直到2021年外借韦斯咸，连格终於大爆发，喺16场联赛交出9个入波同5次助攻，仲得以重返英格兰国家队。可惜好景不常，连格之後重返曼联继续坐冷板，上季加盟诺定咸森林亦表现差劲，约满後搞到冇班落。

连格喺夏天曾去国际迈亚密操练，近日就喺韦斯咸跟操，《标准晚报》指韦斯咸领队莫耶斯认为佢表现唔错，打算向佢开出一张短期合约。莫耶斯早前曾表示畀连格跟操，只系想帮助佢回复状态，并冇计划签约，不过连格似乎用表现令莫耶斯改变主意。