周一(4日)凌晨西甲赛事，巴塞隆拿作客2比1击败奥沙辛拿，开季4轮有3胜1和，继续力逼全胜嘅榜首皇家马德里。巴塞隆拿今场有祖奥菲历斯同祖奥简些路首演，教练沙维对祖奥菲历斯有赞冇弹，似乎非常满意呢单交易。

巴塞今仗控制战局，完半场前凭祖利斯古迪接应角球顶入，不过去到76分钟一次大意，被奥沙辛拿嘅艾斯基尔艾维拉睇到定射入。巴塞之後换入祖奥菲历斯加强攻力，转头罗拔利云度夫斯基即喺禁区内被拉跌，博到12码兼令对手食红牌，「罗拔仔」喺85分钟操刀射入致胜球。

巴塞教练沙维赛後赞扬祖奥菲历斯：「我哋缺少单对单过人，球员需要更大胆，换人令我哋中场更有优势，菲历斯可以为我哋带嚟变化，无论踢前锋定左翼，佢都可以有出色表现。祖奥菲历斯可以为巴塞带嚟好多嘢，今日我会特别表扬佢嘅态度。」