曼联作客阿仙奴嘅英超大战，尾段出现一众「曼迷」难以想像嘅一幕，连埋补时嘅最後15分钟，曼联竟然用庄尼伊云斯拍哈利马古尼做中坚组合，最终阿仙奴喺尾段连下两城赢波，不过今次「曼迷」矛头就唔系指向哈利马古尼，而系回巢後首踢英超嘅庄尼伊云斯。

曼联赛前有华拉尼受伤缺阵，今仗用域陀连迪路夫搭利辛度马天尼斯镇守中路，点知利辛度马天尼斯下半场一次犯规踢人食黄牌，反而搞到自己受伤要退下火线，哈利马古尼得以今季首度上阵；踢到84分钟，域陀连迪路夫亦因体力透支，要由夏天回巢嘅庄尼伊云斯入替，系呢位35岁老将相隔8年後再为曼联喺英超上阵。

庄尼伊云斯亦相当黑仔，迪格兰赖斯96分钟入波就系省中佢改变方向弹入，而加比尔捷西斯101分钟入波，亦系庄尼伊云斯「包越位」而失。赛後大批网民留言：「2023年啦，仲系伊云斯拍马古尼？」「2个失波都关伊云斯事，佢明显唔够状态！」「我唔怪坦哈格，怪就怪个班主畀啲咁嘅人佢！」