西班牙将於9月9日及13日凌晨出战欧国盃外围赛，分别斗格鲁吉亚、塞浦路斯，领队富安迪徵召年仅16年嘅巴塞隆拿前锋耶马入伍，如果佢上阵，就可以打破加维保持嘅西班牙史上最年轻披甲纪录，以耶马近期勇态，加上对手都系弱队，相信富安迪会畀耶马创造历史。

巴塞隆拿中场加维2021年以17岁零62日首次为西班牙上阵，成为「斗牛兵团」史上最年轻上阵球员，富安迪9月1日公布大军名单，耶马首次入选大国脚，当日佢只系16岁零50日，只要佢嚟紧对格鲁吉亚或者塞浦路斯披甲，就可以打破加维嘅纪录，并且推前近1岁，实在非常跨张。

耶马可以晋身西班牙大国脚，甚至获得上阵机会，并唔令人意外，因为佢今季已成为巴塞隆拿主力，近3场西甲都担任正选，其中对维拉利尔，佢传畀加维顶入，打破队友安素法迪纪录，成为踏入21世纪以来，西甲最年轻取得助攻嘅球员，16岁嘅耶马同19岁嘅加维为巴塞及西班牙国家队刮起一股青春风暴。