荷兰将於周五(8日)凌晨欧国盃外围赛主场对希腊，「橙衣兵团」史上入波第2多嘅射手迪比受伤冇入选，利物浦前锋加普陷入入球荒，今季仲未入波，幸好荷兰人才辈出，2位喺德甲搵食嘅进攻猛将沙维西蒙斯、当耶尔马伦状态大勇，成为球队争取入波嘅关键人物。

现年20岁嘅沙维西蒙斯出身名门，曾於巴塞隆拿青年军受训，其後加盟巴黎圣日耳门(PSG)，上季转投燕豪芬，上阵48场入22球，结果PSG今夏回购佢，再外借去RB莱比锡。呢位天才新星转战德甲，上阵3场已入2球及3次助攻，表现光芒四射，可以话系现时荷兰阵中状态最勇猛球员。

由於荷兰过往锋线人才众多，沙维西蒙斯只有5次国家队上阵经验，但随住迪比、贝云积受伤落选，沙维西蒙斯今仗有望趁机担正。

至於效力多蒙特嘅24岁射手当耶尔马伦今季德甲3次上阵亦有2球进帐，佢可以胜任前锋同右翼，技术非常全面，令荷兰主帅朗奴高文战术部署方面更灵活，今仗等睇沙维西蒙斯、当耶尔马伦表演。