世盃後欧洲球坛势力重新洗牌，唔少传统劲旅都进入调整期，反而几支二线球队愈踢愈有，喺今届欧国盃外围赛早段突围上位。今届欧国外10组当中，目前有6组榜首球队冇份踢卡塔尔世盃，包括苏格兰、土耳其、捷克、奥地利、匈牙利、以及芬兰／哈萨克，呢班球坛「小强」有望制造欧洲新秩序！

兰历克有料到奥地利脱胎换骨

奥地利自上年4月聘请前曼联看守领队兰历克执教之後，表现脱胎换骨，对强队亦唔失礼，欧国盃外围赛作客打和球星如云嘅比利时，目前排F组榜首有根有据。

推崇逼抢战术啱晒Key

德国名帅兰历克有「现代足球教父」之称，推崇逼抢战术，虽然呢套踢法喺曼联未能成功，但就非常适合奥地利，事关奥地利冇乜大牌球星，亦非技术型球队，球员服从兰历克指挥，不惜体力一人行多一步做压迫，效果非常好。

喺兰历克领军下，奥地利曾於上年欧国联大炒克罗地亚3比0，主场更打和法国，其後热身赛亦以2比0砌低上届欧国盃冠军意大利，加上今届外围赛成绩彪炳，证明兰历克改革方向正确，令奥地利成为足以挑战列强嘅欧洲新势力。

新星涌现土耳其令人期待

土耳其上届欧国盃决赛周，喺分组赛3战皆北出局，不过随住土超联赛水平日益提升，国家队亦明显得益，近年更涌现唔少新星，令球迷重新抱有期待。土耳其目前喺Ｄ组4战3胜排榜首，虽然踢少两场嘅克罗地亚仍然系出线大热，但土耳其绝对有能力坐2望1。

18岁艾达古拿才华洋溢

土耳其喺前德国Ｕ23领队根斯带领下，重视提携新人，令青黄不接多年嘅国家队重现生机，其中最令球迷兴奋嘅，首推今夏高价加盟西甲班霸皇家马德里嘅18岁天才艾达古拿，土耳其6月欧国外击败威尔斯，呢位中场就拎到国际赛首个入波。

除艾达古拿外，土耳其国家队仲有唔少猛将，好似宾菲加嘅22岁中场奥简高古及啱啱加盟曼联嘅25岁门将比恩迪亚，加上喺国家队打滚多年嘅苏恩古、辛基斯安达等经验老将，土耳其整体实力绝对唔失礼，以老带新下占据榜首位置，唔令人意外。

荣升「英伦1哥」苏格兰势头坚劲

苏格兰喺上届欧国盃决赛周分组赛，3战只得1和2负，之後喺世盃外附加赛亦惨遭淘汰，虽然如此，但睇到佢哋喺前西布朗主帅奇勒带领下，持续进步。以往苏格兰大军夹杂好多来自苏超、英冠、甚至英甲等球员，水准偏低。

多位球员喺英超企稳阵脚

不过近年情况唔同，除咗约翰麦甘尼上季喺阿士东维拉荣升队长，以及左闸安德鲁罗拔臣属利物浦必然正选外，好多球员都能够喺英超球队企稳阵脚，包括白礼顿中场比利基莫亚、宾福特右闸艾朗希基及爱华顿後衞尼敦柏达臣，均有一定上阵机会。此外基兰泰亚尼同李维士费格逊亦外流西甲同意甲，同之前以些路迪及格拉斯哥流浪球员为骨干相比，明显升呢。

苏格兰早前喺欧国联B1组排首位，之後会重返A组级别，加上英格兰喺欧国联跌落B组级别，令苏军成为「英伦1哥」。食住个势，佢哋喺今届欧国外Ａ组头4轮全胜，力压挪威同西班牙排榜首，令人喜出望外，有力连续两届杀入欧国盃决赛周。

运气实力俱备捷克发围好时机

正所谓好波不如好运，捷克今届欧国盃外围赛抽到靓签，同组最强对手只系波兰，其余几队阿尔巴尼亚、摩尔多瓦同法罗群岛，根本唔入流，呢支东欧球队亦把握到难得机会，暂时喺E组领导群雄。

自从尼维特等名将退役後，捷克一度陷入青黄不接困局，好在近年开始有批具质素新血，包括利华古逊前锋柏德列舒希克及禾夫斯堡前锋切尔尼，加上韦斯咸队长汤马士苏锡克，绝对实而不华，近年代表作一定系两年前欧国盃决赛周16强淘汰荷兰。

小组首仗杀退劲敌波兰

捷克喺主帅舒夏维执教5年底下愈见进步，外围赛首仗面对有罗拔利云度夫斯基压阵嘅波兰，捷克喺呢场出线关键战以3比1杀退对手，证明有运气亦有实力。

苏保斯拉尔撑起匈牙利

两届世盃亚军匈牙利喺国际舞台沉寂多年，直至对上两届欧国盃杀入决赛周先再次受到注视。事实上佢哋近年新生代冒起开始爆发，当中以效力利物浦嘅中场苏保斯拉尔最有代表性，堪称系国家队成败「关键先生」。

战力担当做埋队长

匈牙利目前喺G组3战2胜1和，凭较佳得失球力压出线劲敌塞尔维亚。苏保斯拉尔虽然年仅22岁，但已经身经百战，匈牙利上届欧国盃就系靠佢喺附加赛补时绝杀冰岛，得以进身决赛周，依家佢更成为国家队队长，可谓众望所归。

苏保斯拉尔系球队战力泉源，不过想出线都需要其他拍档帮手，当中年仅19岁嘅卡基斯以及23岁嘅宾迪古斯波拿，都已经被英超球队招揽，此外基斯顿尼美夫等新星亦日渐成熟，以年轻球员为主嘅匈牙利，若然保持进步，有望成为欧国盃奇兵一路。

芬兰哈萨克「舢舨变炮舰」有惊喜

当欧国盃外围赛抽完签後，球迷都谂住H组系丹麦天下，点知4轮过後，依家排小组前两位嘅，居然系芬兰同哈萨克，堪称奇景。

踢出斗志力压丹麦

芬兰向来喺欧洲只属二线尾球队，领军人物系已经远走美职嘅迪姆普基，现时喺5大联赛搵食嘅球员，实在寥寥可数，较为球迷熟悉相信系利华古逊门将哈迪基。不过芬兰就凭住一班非主流联赛球员化身「不死小强」，喺欧国外踢出一片天，暂时以9分排榜首，较出线热门丹麦仲要多2分。

如果芬兰系「小强」，哈萨克就更加系「小小强」。佢哋向来系「强队点心」，上届世盃外对法国曾经狂吞8蛋，点知如今突飞猛进。哈萨克阵中得5名外流球员，其余全属土炮，不过外围赛踢出烧鹅味道，作客赢北爱尔兰唔出奇，主场反胜丹麦3比2先吓人一跳，现时佢哋因得失球较差排次席，嚟紧主场将同芬兰合演榜首大战。