意大利名帅文仙尼执教沙特阿拉伯国家队之後，第1场比赛就输波，喺热身赛1比3不敌哥斯达黎加，据悉赛後沙特政府下令禁止文仙尼接受访问，似乎惊佢输波心情唔好会「讲错嘢」。

今场比赛喺英格兰圣占士公园球场举行，但只有唔够5,000人入场睇波，沙特阿拉伯即使由欧国盃冠军名帅文仙尼领军，但上半场已经落後2球，最终输1比3。赛後文仙尼并冇接受传媒访问，盛传系由於沙特政府下达「封口令」，要求佢保持沉默。

现年58岁嘅文仙尼曾协助国际米兰3次捧意甲冠军，亦系曼城首夺英超冠军时期嘅主帅，2年前带领意大利赢得欧国盃冠军，但未能打入上年世界盃决赛周。文仙尼上月底突然辞去意大利领队之职，转工担任沙特阿拉伯主帅，签约3年，薪酬总值达到7,700万镑(约7.5亿港元)，但似乎未能令沙特起死回生，各项赛事近5场都输波，将於下周三(13日)凌晨同南韩踢热身赛。