克罗地亚日前喺欧国外5比0大炒拉脱维亚，莫迪历、比列锡、波索域等老臣子继续担正，虽然唔少球迷对波索域选择去沙特阿拉伯落班表示怀疑，不过克罗地亚领队达历就力撑爱将，表示沙特足球水平提升唔少，国家队位置唔需要担忧。

波索域今个夏天由国际米兰转投艾纳斯，有球迷担心佢嘅竞技水平难以维持，不过领队达历表示：「好多人都轻视沙特联赛嘅水平同质素，我10年前都喺沙特教波，或者当时系会有问题，但依家所有人都重视沙特联赛，佢哋有C朗、宾施马等巨星，波索域已经踢咗5、6场精彩赛事，表现更胜喺意甲，佢落场一定会付出所有，我完全唔担心佢。」

事实上，达历本身对沙特联赛认识深厚，喺佢接任克罗地亚主帅前，曾经喺沙特执教长达7年，教过希拉尔、艾阿恩等劲旅，2016年甚至率领艾阿恩杀入亚冠盃决赛。