周日(10日)凌晨史丹福桥球场上演「维埃里纪念赛」，车路士传奇队以4比0大胜拜仁慕尼黑传奇队，「蓝战士」传奇队长泰利当年由维埃里一手提携，今场纪念赛佢入波後，双手指天向呢位恩师致敬，场面感人。

呢场比赛系纪念今年1月因胰脏癌去世嘅维埃里，呢位意大利前锋曾以球员同领队身份效力车路士4年，帮球队拎过英足总、英联盃同欧洲盃赛冠军盃冠军，1998年更加畀泰利第1次为车路士上阵，成就呢位中坚嘅车路士传奇之路。

车路士今场有唔少名将参加，包括苏拿、迪马堤奥2位意大利名将，其他车路士传奇好似马基列尼、艾辛、施治、拿保夫、费奥、马隆达、约翰米基尔、沙洛文卡劳等都有出席，最终车仔凭艾辛、泰利、加利卡希尔同堤亚高文迪斯入波大胜4比0。

泰利喺场刊入面表达对维埃里嘅敬意：「维埃里加盟嗰阵系球坛超级巨星，但佢对我哋呢啲新人一样咁友善.....维埃里对我嘅提拔之恩，我一世都会记住。」