今夏几乎离队嘅基尔获加唔止冇走人，现时更加落实同曼城续约至2026年夏天，意味呢位33岁後衞好大机会留喺「蓝月亮」挂靴。据悉基尔获加之所以愿意续约，全因为领队哥迪奥拿请佢食饭，以诚意打动呢位英格兰国脚留队。

基尔获加曾经不满上季上阵时间减少，一度准备转投拜仁慕尼黑，但主帅哥迪奥拿极力挽留，除咗自掏腰包请佢食饭，亲自游说佢留队之外，并且向呢位老将开出3年长约，令基尔获加可以专注为曼城搏杀。

基尔获加2017年以5,000万镑(约4.9亿港元)转会费由热刺加盟曼城，为「蓝月亮」上阵260场入6球，捧过5次英超、4次英联盃等锦标，亦系上季夺得欧联、英超及英足盃「三冠王」主力，呢位老大哥续约有助稳定防线。