欧联过後，今晚轮到上演欧霸盃分组赛，最多球迷留意必定系E组英超劲旅利物浦作客奥地利球队宁斯，「红军」利物浦相隔7年再战呢项「二奶盃」，为赛事带来新鲜感，但利记首要目标都系英超，主帅高普好可能会轮换阵容，以部分副选应战，不宜高估。宁斯自知实力唔及对手，应该会主守，以佢哋近9场正式赛事有8场总入球开出3球或以下嘅走势，可博中位数3.5球嘅入球细。

利物浦上季英超仅得第5位无缘欧联，继2015/16年球季之後，再次转战欧霸盃，睇番当年红军虽然以小组首名出线，但其实6场分组赛仅2胜4和，可见佢哋唔会喺赛事初段太搏命，毕竟分组赛即使失分，仲有机会追，而且对手实力较弱，利物浦根本冇必要出尽全力，今仗小胜已经足够，最重要系保持体力踢英超。

事实上，利物浦领队高普近期已经开始推行轮换制，上仗英超对狼队，甚至派出20岁中坚查利尔昆沙踢正选，今仗面对实力更弱嘅宁斯，高普更加有理由出副选。

另边厢，宁斯以往不时有机会出战欧霸盃，但只属於陪跑分子，最近一次踢分组赛已经系2020/21年球季，结果仅得小组第3位出局。宁斯今季奥甲联赛表现亦只属一般，7战获得4胜2和1负，实力、经验、状态都唔可以同利物浦相提并论，预料会「泊大巴」防守博和希望有分落袋，攻防战格局入波唔会多。