周四(21日)朝早美职赛事，国际迈亚密有美斯复出挂帅，不过呢位阿根廷「球王」只系踢咗37分钟就主动要求离场，教练马天奴赛後指美斯虚耗过度，下场联赛唔会上阵，1星期後嘅美联盃决赛可唔可以上阵亦成为疑问。

美斯为阿根廷踢完世盃外後，上场作客阿特兰大联已经休息，点知今场复出踢37分钟，就见佢主动要求被换，返到後备席亦显得筋疲力尽，好在队友够争气，喺美斯离场後愈踢愈有，最终4比0大胜FC多伦多，继续向季後赛迈进。

除美斯之外，西班牙球星佐迪艾巴喺35分钟亦被换走，教练马天奴赛後表示：「佢哋练波嗰阵好正常，所以觉得可以喺今仗上阵，佢哋应该唔系肌肉受伤，只不过系疲劳，下场对奥兰多城(25日)佢哋一定唔会踢。」国际迈亚密下周四(28日)会喺美联盃决赛对侯斯顿戴拿模，美斯赶唔赶得切上阵，会系球迷关注话题。