成绩每况愈下嘅英超劲旅车路士，经历45年最差开季後，领队普捷天奴正承受巨大压力。有英国传媒爆料，车路士周日(24日)主场输畀阿士东维拉一仗，前皇家马德里教练卢比迪古出现喺车路士包厢观战，令易帅传闻再次沸腾。

英国媒体《Birmingham World》报道，今季开咧前突然辞去狼队主帅一职嘅卢比迪古，一直希望再喺英超寻找执教机会，日前获邀去史丹福桥球场包厢睇波，就令车路士领队普捷天奴蒙受更大压力。今年4月林柏特曾喺车路士主场包厢观战，几日後就获聘取代般奴沙托出任看守领队。

现年57岁嘅西班牙教头卢比迪古，曾经执教过波图、皇家马德里、西维尔同西班牙国家队等重要球队，上季季中加盟狼队亦帮球队逃出降班漩涡，但今个夏天因为狼队财政问题，喺转会市场未兑现增兵承诺，卢比迪古一怒之下喺开咧前劈炮。

车路士开季6场联赛只得5分，班主之一嘅艾巴利对维拉完场後入更衣室训话，同美国班主保利上季尾入更衣室「干政」一样引起争议，令人担心普捷天奴权力被架空。另外，车路士教练团之一嘅般奴沙托，据报已被车路士秘密炒鱿，而且球会冇打算官方宣布，似乎想低调「改革」。

普捷天奴喺对维拉赛後，曾被问到班主对球队表现嘅意见，呢位阿根廷主帅承认班主觉得「失望」，但就强调自己需要更多时间。车路士喺10月份开始会展开地狱赛程，未来9场联赛要硬撼阿仙奴、热刺、曼城、纽卡素、白礼顿同曼联等劲旅。