纽卡素同巴黎圣日耳门(PSG)将於周四(5日)凌晨欧联交锋，全世界留意基利安麦巴比等射手嘅时候，其实双方右後衞捷比亚、阿舒拉夫可能先至系主角，2人助攻力强，而且近况大勇，今仗大斗法，随时成为决定胜负嘅「关键先生」。

虽然捷比亚已经33岁，但仍然有心有力，近2场英超都贡献助攻，包括对锡菲联一役，上演「助攻戴帽」。呢位英格兰国脚唔止传波精准，而且擅於处理罚球，遇上实力强劲嘅PSG，纽卡素要组织攻势并唔容易，更需要利用死球战术争取入波，捷比亚可以大派用场。

至於PSG右闸阿舒拉夫仲犀利，近5次上阵入3球及1次助攻，包括上轮欧联对多蒙特，射入1球。基利安麦巴比唔少入波来自呢位24岁摩洛哥国脚嘅传送，「麦总」早前曾经受伤之後，状态麻麻，难以靠自己单打独斗，令阿舒拉夫嘅辅助显得更重要。