欧联「死亡F组」出现惊人赛果！英超劲旅纽卡素周四(5日)凌晨主场迎战巴黎圣日耳门(PSG)，主队踢出超强气势辗压对手，以4比1大炒该法甲班霸，拎到20年来首场欧联胜仗。PSG王牌前锋基利安麦巴比今场碌碌无为，输到发脾气喺完场後极速走人。

纽卡素首仗作客闷和AC米兰，今仗返主场展现霸气，对住亿万大军PSG都毫无惧色，17分钟前场截击成功，米基尔阿米朗射成1比0；39分钟纽卡素连环攻门搞到PSG後防大乱，丹般恩头槌顶入拉开到2比0。50分钟桑恩朗达夫高速入楔射到3比0，卢卡斯靴南迪斯喺56分钟帮客队破蛋，但纽卡素补时阶段由法比安舒哈入世界波埋斋，大胜4比1完场。

纽卡素自2003年赢利华古逊後，球迷等足7,525日再次见证佢哋喺欧联正赛赢波，而丹般恩同桑恩朗达夫2位英格兰球员建功，更加系「喜鹊」自1997年班尼斯同皮雅斯後，首次喺欧联有2位本土球员一齐入波。F组另一仗多蒙特同AC米兰打和0比0，有4分在手嘅纽卡素得以喺死亡之组排榜首。

被视为出线大热嘅PSG，今场经历6年来欧联最大败仗，基利安麦巴比全场0次成功过人，而且多次向住後防摊大双手埋怨，完场後更加第一时间直冲更衣室，未有同到场打气嘅巴黎球迷致谢。PSG教练安历基赛後表示：「我哋唔值得输咁多，球队目标系出线，我哋依家仲排紧第2位。」