曼联中场麦汤米尼上仗英超後备上阵入2球，协助球队奇迹反胜宾福特，并且喺今届欧国盃外围赛为苏格兰入6球，令人啧啧称奇，苏格兰国家队主帅奇勒表示，麦汤米尼性格稳重，从不抱怨，所以能够克服难关，重要时候作出巨大贡献。

奇勒话：「老实讲，麦汤米尼喺曼联做後备，令我感到惊讶，我唔系曼联领队，唔知内部发生咩事，总之麦汤米尼展现出个性，佢本来可以对上阵时间不足，表达不满，但佢冇咁做，而系努力工作，等待机会，佢上场英超入2球，我为佢感到高兴。」奇勒更加透露麦汤米尼原本可以今夏离开曼联，但佢选择留队证明自己，依家终於做到。

苏格兰将於周五(13日)凌晨欧国盃外围赛作客西班牙，双方上次交锋，苏格兰凭麦汤米尼梅开二度，爆冷赢2比0，呢位26岁猛将今仗随时又有佳作。