上届欧国盃冠军意大利却於今届外围赛陷入苦战，余下2场对北马其顿、乌克兰成为生死战，幸好今季冒起1位「意甲比宁咸」高彭尼，呢位24岁蒙沙中场频频入波，首次晋身意大利国家队，成为「蓝衣兵团」争出线嘅秘密武器。

高彭尼今季意甲上阵12场射入6球及1次助攻，属於现时联赛入波最多嘅中场，射手榜上仅次於国际米兰前锋拿达路马天尼斯、AC米兰前锋基奥特。呢位新星後上射门能力强之外，亦具备远射脚头，因而被指踢法似皇马中场祖迪比宁咸。

高彭尼接受传媒访问时话：「好荣幸可以同比宁咸相提并论，但我唔会谂太多，只想为蒙沙取得佳绩，继续帮助队友。」对於首次晋身大国脚，高彭尼话要感激今年6月逝世嘅蒙沙班主贝鲁斯干尼栽培：「我想将入选国家队嘅荣誉送畀天上嘅贝鲁斯干尼，我会努力证明自己值得占国家队1席位。」

意大利近年锋线力量疲弱，为人诟病，高彭尼脚风极顺，或者真系可以扮演祖迪比宁咸喺皇马嘅角色，成为球队破门利器。