南韩球星孙兴民上场世界盃外围赛对新加坡，被对手踢伤痛苦倒地，一度令人怀疑呢位31岁前锋能否出战下周二(21日)晚世盃外作客中国队。「孙仔」报平安发表声明，扬言一定会继续上阵，愿意为南韩付出所有，对於国足球迷而言，实在系一单坏消息。

南韩上仗大胜新加坡5比0，孙兴民入咗1球，但亦喺比赛中被对手踢中足踝，需要军医入场治疗。由於热刺伤兵问题严重，包括2位主力占士麦迪臣、云迪尹受伤，不禁令人担心「孙仔」会加入「十字兵」行列，所以唔少热刺球迷劝吁佢避战中国，毕竟对手实力较弱，孙兴民冇必须冒险上阵，令伤势恶化。

不过，孙兴民表示自己有责任尽力为国家队比赛，佢话：「我哋全队以打入世界盃决赛周为目标，我唔可以因为感到痛楚而退下，如果我跑都跑唔到，我自然知道点做，但如果我仲可以跑动，就一定要付出100%，我现时情况良好，冇受伤问题。」南韩同中国上场都旗开得胜，今次交锋预料有激斗。