皇马中场祖迪比宁咸以大热姿态夺得金童奖，成为继朗尼、史达宁之後，史上第3位获此殊荣嘅英格兰球员，呢位20岁新星今季加盟「银河舰队」後，演出光芒四射，同艾宁夏兰特、基利安麦巴比并驾齐驱，成为最有机会问鼎明年金球奖嘅3位球员之一。

祖迪比宁咸接过昔日法国球王施丹嘅皇马5号球衣之後，果然踢出球王水平，为皇马上阵14场射入13球及3次助攻，8次当选比赛最佳球员，现时以10个入球，排西甲射手榜第1位，对於1位中场球员而言，实在难能可贵，佢获得金童奖，绝对实至名归。

金童奖由意大利《都灵体育报》2003年创办，旨在表扬每年最佳表现嘅21岁以下球员，上年得主系巴塞隆拿中场加维，巴黎圣日耳门前锋基利安麦巴比、曼城射手艾宁夏兰特分别於2017年、2020年获此殊荣，可以话系新星走上巨星之路嘅起点。不过，亦有失败例子，保罗普巴、安东尼马迪尔曾经获得金童奖，但之後事业发展令人失望。