根据德国《天空体育》爆料，曼联中坚华拉尼对於伤愈之後长期屈居後备感到不满，有意明年1月冬季转会市场重开後离队，德甲劲旅拜仁慕尼黑计划趁机签入呢位30岁法国名将，舒缓防线人脚荒问题。

拜仁2位中坚马菲斯迪历特、乌柏美卡奴受到伤患问题困扰，教练杜曹认为有需要收购新中坚，并睇中华拉尼，已开始展开内部讨论，睇下有冇可能签入佢。据估计华拉尼身价为2,000万镑(约1.95亿港元)，呢笔转会费对於拜仁而言，问题不大，最大障碍系华拉尼年薪高达1,770万镑(约1.73亿港元)，拜仁未必可以开出呢个人工签佢，除非华拉尼愿意减薪。

其实拜仁慕尼黑并非华拉尼唯一出路，早前传出沙特阿拉伯球队艾纳斯想签佢，以呢支中东豪门嘅财力，相信可以开出比佢现时人工更高嘅合约，问题系华拉尼到底想去沙特「养老」，亦或继续留喺欧洲参加高水平赛事。