周一(27日)凌晨英超大战，近期演出渐趋稳定嘅曼联，作客3比0大胜爱华顿豪取英超3连胜。「红魔鬼」今场最大功臣系小将阿历真度加拿祖，佢嘅惊天倒挂金勾入波为球队打破僵局，重现「2R」朗尼、C朗拿度嘅神级功架，几乎可以提早Book定今季「全年最佳入球」奖。

面对早前被扣10分钟嘅爱华顿，曼联今场全力出击，开波3分钟就出现震撼场面，加拿祖接应达洛治右路传中，虽然个波已经去到身後，但呢位阿根廷新星就转身施展倒挂，一气呵成轰出一记力度、角度兼备入波，令人谂起朗尼喺2011年对曼城，以及C朗5年前喺欧联嘅超级倒挂，加拿度入波後亦做出偶像C朗嘅庆祝动作，犹如「2R」上身。

爱华顿其实都有唔少入肉攻门，又要救空门、又要靠门楣救驾，不过曼联仍然靠拉舒福特嘅12码，以及安东尼马迪尔乖巧挑射入多2球，最後大胜3比0。曼联近6场联赛5胜後，依家只系落後榜首阿仙奴6分，仍然有机会争取好成绩。

19岁嘅加拿祖赛後成为「人气王」，佢对自己入嘅金球亦非常满意：「老实讲，我唔相信自己入到呢球波，我冇睇到个波点入，只系听到观众席上『我的天』嘅呼叫声，呢球绝对系我最佳入球之一，我好开心。」佢之後再喺IG贴出C朗2018年欧联对祖云达斯嘅倒挂图对比。

曼联上下亦纷纷吹捧呢位新星，领队坦哈格表示：「一个伟大嘅时刻，好可能会系今季英超最佳入球。」助攻嘅达洛治就话：「难以置信！加拿祖去拎普斯卡斯奖嗰阵可唔可以带埋我？唔该！」名宿加利尼维利亦指：「我从未亲眼见过咁精彩嘅倒挂，而朗尼当年对曼城嘅倒挂，我系在场。」