现年30岁嘅英格兰中场巴克里，今季重返英超加盟新升班嘅卢顿，表现脱胎换骨，近2场对阿仙奴同曼城虽然输波，但佢嘅表现就大获好评。据报巴克里嘅出色表现已引起英格兰领队修夫基注意，有机会重返英格兰国家队！

巴克里喺爱华顿出道後被誉为天才新星，但2018年转投车路士後表现大跌，上季更外流法甲嘅尼斯，足球生涯一直走下坡。估唔到今季重返英超愈战愈勇，最近连续7场英超正选上阵，系佢6年来首次，上星期对阿仙奴更有入波，据英国《每日星报》报道，修夫基嘅教练团正密切注视巴克里表现。

巴克里曾经33次代表英格兰国家队上阵，但对上一次已经系2019年6比0赢保加利亚，该仗佢交出2个入波同1次助攻，唔少球迷留言表示：「巴克里应该取代加云菲腊斯」、「巴克里+迪格兰赖斯+祖迪比宁咸，呢条中场可以帮英格兰赢欧国盃」！